நெஞ்செரிச்சல் சாதாரணமா? NHS சொல்வது என்ன?

வாழ்வின் ஏதோ ஒரு கட்டத்தில் செரிமானக் கோளாறு (Indigestion) மற்றும் அதனுடன் தொடர்புடைய பல்வேறு அறிகுறிகளால் பெரும்பாலானோர் பாதிக்கப்படுவதாக பிரிட்டனின் தேசிய சுகாதார சேவை (NHS) தெரிவித்துள்ளது. குறிப்பாக கிறிஸ்துமஸ், புத்தாண்டு போன்ற பண்டிகைக் காலங்களில், கொழுப்பு மற்றும் மசாலா நிறைந்த உணவுகளை அதிகமாக உட்கொள்வதும், மது அருந்துவதும் செரிமானப் பிரச்னைகளுக்கான வாய்ப்புகளை பலமடங்கு அதிகரிக்கின்றன.

உதவி தேடும் மக்கள் எண்ணிக்கை அதிகரிப்பு

பண்டிகைக் காலங்களில் செரிமானக் கோளாறு, நெஞ்செரிச்சல், வயிற்று எரிச்சல் போன்ற பிரச்னைகளுக்கான தகவல்களை தேடி, NHS இணையதளம் மற்றும் தேடுபொறிகளில் மக்கள் அதிக அளவில் தேடுவதாகவும் அந்த அமைப்பு தெரிவித்துள்ளது. இது, இந்த பிரச்னை எவ்வளவு பொதுவானதாக உள்ளது என்பதை வெளிப்படுத்துகிறது.

நெஞ்செரிச்சல் – முக்கிய அறிகுறி

நெஞ்செரிச்சல் என்பது செரிமானக் கோளாறின் முக்கியமான மற்றும் பொதுவான அறிகுறிகளில் ஒன்றாகும். இது பெரும்பாலும் மார்புப் பகுதியில், குறிப்பாக மார்பக எலும்பின் பின்னால் எரிச்சல் அல்லது தீப்பற்றும் உணர்வாக வெளிப்படும். சிலருக்கு இது தொண்டை வரை பரவும் அசௌகரியத்தையும் ஏற்படுத்தும்.

இந்த பதிவும் உதவலாம்: நெஞ்செரிச்சலால் அவதியா? இதற்கான சிறந்த மற்றும் மோசமான உணவுகளின் பட்டியல் இதோ.. நிபுணர் தரும் விளக்கம்

ஆசிட் ரிஃப்ளக்ஸ் என்றால் என்ன?

லண்டன் குயீன் மேரி பல்கலைக்கழகத்தின் விரிவுரையாளரும், ராயல் லண்டன் மருத்துவமனையின் இரைப்பை குடல் நிபுணருமான டாக்டர் பிலிப் வுட்லேண்ட் இதுகுறித்து விளக்குகையில், “வயிற்றில் இயல்பாக உள்ள அமிலச் சாறுகள், அமிலம் இருக்கக்கூடாத உணவுக்குழாயின் மேல்பகுதிக்குச் செல்லும்போது அதை ‘ஆசிட் ரிஃப்ளக்ஸ்’ என்கிறோம்” என்றார். மேலும், “இந்த ஆசிட் ரிஃப்ளக்ஸின் மிகவும் பொதுவான அறிகுறிதான் நெஞ்செரிச்சல். இது மார்பக எலும்பின் பின்னால் எரிச்சல் உணர்வாக தெரியும்” என்றும் அவர் குறிப்பிட்டார்.

பண்டிகைக் காலங்களில் ஏன் அதிகரிக்கிறது?

அதிக எண்ணெய், மசாலா, இனிப்புகள், கார்பனேற்றப்பட்ட பானங்கள் மற்றும் மது போன்றவை வயிற்றில் அமிலச் சுரப்பை அதிகரிக்கின்றன. இதன் விளைவாக, ஆசிட் ரிஃப்ளக்ஸ் மற்றும் நெஞ்செரிச்சல் போன்ற பிரச்னைகள் பண்டிகைக் காலங்களில் அதிகமாகக் காணப்படுகின்றன.

இறுதியாக..

செரிமானக் கோளாறு மற்றும் நெஞ்செரிச்சல் போன்ற பிரச்னைகள் பொதுவானவையாக இருந்தாலும், அவற்றை அலட்சியப்படுத்தக் கூடாது. குறிப்பாக பண்டிகைக் காலங்களில் உணவுக் கட்டுப்பாடு, மிதமான உணவு பழக்கம் மற்றும் மதுபானத்தை தவிர்ப்பது போன்றவை இந்த பிரச்னைகளைத் தவிர்க்க உதவும். அறிகுறிகள் தொடர்ந்து நீடித்தால், மருத்துவரை அணுகுவது அவசியம்.

Disclaimer: இந்தக் கட்டுரை பொது விழிப்புணர்வுக்காக மட்டுமே வழங்கப்படுகிறது. இதில் கூறப்பட்ட தகவல்கள் மருத்துவ ஆலோசனையாகக் கருதப்படக் கூடாது. செரிமானக் கோளாறு அல்லது நெஞ்செரிச்சல் அறிகுறிகள் தொடர்ந்தால், தகுந்த மருத்துவரை அணுகுவது அவசியம்.