ஒழுங்கற்ற மாதவிடாயை சரிசெய்யும் பாட்டி வைத்தியம்.! நிபுணர் பரிந்துரை..

பெண்களின் உடல் நலத்தில் மிகவும் முக்கியமானதாகக் கருதப்படும் மாதவிடாய் சுழற்சி, பலருக்கு ஒழுங்கின்றி காணப்படுகிறது. பிசிஓஎஸ் (PCOS), தைராய்டு செயலிழப்பு, ஊட்டச்சத்து குறைபாடு, ஹார்மோன் சமநிலை கோளாறு, உடல் எடை மாற்றம், அனீமியா போன்ற பல காரணங்கள் இதற்கு ஆதாரமாக இருக்கின்றன. சிலருக்கு மாதம் தோறும் 5 முதல் 10 நாள் வரை தாமதமாவதும் பொதுவான புகார்.

இந்த சிரமத்தை சமாளிக்க, காலங்காலமாக பின்பற்றப்பட்ட ஒரு பாரம்பரிய வீட்டு வைத்தியம் தற்போது சமூக வலைதளங்களில் அதிகம் பேசப்படுகிறது. பெண்களின் மாதவிடாய் சுழற்சியை இயற்கையாக ஒழுங்குபடுத்த உதவும் இந்த வைத்தியத்தின் செய்முறை கீழே பார்க்கலாம்.

ஒழுங்கற்ற மாதவிடாயைச் சீராக்கும் வீட்டுவைத்தியம்

தேவையான பொருட்கள்

• கருஞ்சீரகம் – 100 கிராம்
• ஓமம் – 100 கிராம்
• பனை வெல்லம் – 100 கிராம்
• மூன்றையும் சம அளவில் பயன்படுத்துவது முக்கியம்.

செய்முறை

• கருஞ்சீரகம் மற்றும் ஓமத்தை தனித்தனியே வெறும் வாணலியில் மெதுவாக வறுக்கவும்.
• முழுமையாக ஆறிய பிறகு பனைவெல்லத்துடன் சேர்த்து மிக்ஸியில் நைசாக அரைக்கவும்.
• இந்த கலவையை நெல்லிக்காய் அளவிலான உருண்டைகளாக உருட்டி கண்ணாடி பாட்டிலில் சேமிக்கலாம்.

எப்படி, எப்போது சாப்பிட வேண்டும்?

• மாதவிடாய் வரும் சுழற்சியின் ஒரு வாரத்திற்கு முன்பே தினமும் காலை வெறும் வயிற்றில் ஒரு உருண்டையை மெதுவாக சாப்பிட வேண்டும்.
• சாப்பிட்ட பிறகு வெதுவெதுப்பான தண்ணீர் குடிக்கலாம்.
• அரை மணி நேரம் வரை வேறு உணவு எதையும் எடுத்துக்கொள்ளக் கூடாது.

இந்த பதிவும் உதவலாம்: கொள்ளு சாப்பிடுறீங்களா? பெண்களுக்கான ரகசிய நன்மைகள் இங்கே!

யாரெல்லாம் எவ்வளவு நாள் சாப்பிடலாம்?

• சிறிது தாமதமாக மட்டுமே வரும் பெண்கள், மாதவிடாய் வருவதற்கு 5 நாட்களுக்கு முன் தினமும் எடுத்துக்கொள்ளலாம்.
• PCOS / கருப்பை நீர்க்கட்டி / ஹார்மோன் பிரச்சனைகளால் மாதம் தள்ளிப் போகும் பெண்கள் - 5 முதல் 11 நாட்கள் வரை காலை, மாலை தலா ஒரு உருண்டை சாப்பிடலாம்.

சில மாதங்கள் தொடர்ந்து எடுத்தால் நல்ல பலன் கிடைக்கும் என்று பாரம்பரிய வைத்தியம் கூறுகிறது.

ஒவ்வொரு பொருளின் மருத்துவ நன்மைகள்

1. கருஞ்சீரகம் – Antioxidant & Hormone Balancer

• உடலின் இன்ஃபிளமேஷனை குறைக்கும்.
• கருப்பை உள்ள கழிவுகளை சுத்தம் செய்ய உதவும்.
• உடல் சூட்டை அதிகரித்து மாதவிடாயை தூண்டும்.

2. ஓமம் – Muscle Relaxant & Metabolism Booster

• மாதவிடாய் கால வலிகளை குறைக்கும்.
• செரிமானத்தையும் குடல் ஆரோக்கியத்தையும் மேம்படுத்தும்.
• உடலில் கொழுப்பு படிதலைக் குறைக்கும்.
• சளி, இருமல் போன்ற பருவ நோய்களுக்கும் நல்லது.

3. பனை வெல்லம் – Iron Rich Uterus Cleanser

• உடல் நீரேற்றத்தை பராமரிக்கும்.
• நோயெதிர்ப்பு சக்தியை அதிகரிக்கும்.
• இரும்புச்சத்து, கால்சியம், மக்னீசியம் நிறைந்தது.
• கர்ப்பப்பை சுருக்கத்தைத் தூண்டி மாதவிடாய் வர உதவுகிறது.

View this post on Instagram

A post shared by Dr.C.K.Nandagopalan (@ck_nandagopalan)

இறுதியாக..

பெண்களின் ஒழுங்கற்ற மாதவிடாய் பிரச்சனையை சீராக்க இந்த பாரம்பரிய கருஞ்சீரகம் - ஓமம் - பனைவெல்ல உருண்டை பல வருடங்களாக வீட்டுவைத்து மருந்தாகப் பயன்படுத்தப்பட்டு வருகிறது. உடலில் ஹார்மோன் சமநிலையை மேம்படுத்தவும், கருப்பை ஆரோக்கியத்தை சுத்தப்படுத்தவும் இது உதவுகிறது என நம்பப்படுகிறது. ஆனால், அளவுக்கு அதிகமாக எடுத்தால் அதிக ரத்தப்போக்கு ஏற்படும் வாய்ப்பு இருப்பதால், கவனமாக பயன்படுத்த வேண்டும்.

பொறுப்பு துறப்பு: இந்தக் கட்டுரை பொதுத் தளங்களில் வெளியான தகவல் மற்றும் பாரம்பரிய வைத்தியத்தை அடிப்படையாகக் கொண்டது. மருத்துவ பிரச்சனைகள், PCOS, தைராய்டு, கருப்பை சம்பந்தப்பட்ட சிக்கல்கள் உள்ளவர்கள் இதைப் பயன்படுத்துவதற்கு முன் உங்கள் மருத்துவரின் ஆலோசனை அவசியம்.