முட்டையின் மஞ்சள் கரு சாப்பிடுவது மாரடைப்பு அபாயத்தை அதிகரிக்குமா? – இதய நிபுணர் விளக்கம்!

நல்ல ஆரோக்கியத்திற்காக முட்டைகள் மிகச்சிறந்த உணவாக பரிந்துரைக்கப்படுகின்றன. புரதம், வைட்டமின்கள், ஆரோக்கியமான கொழுப்புகள் என முட்டை முழுமையான ஊட்டச்சத்து நிறைந்தது.

ஆனால் பலருக்கு மனதில் ஒரு கேள்வி – “முட்டையின் மஞ்சள் கரு சாப்பிட்டால் இதய நோய் வருமா?” இதற்கான விளக்கத்தை ஃபரிதாபாத் மாரெங்கோ ஆசியா மருத்துவமனையின் இதய நிபுணர் டாக்டர் கஜிந்தர் குமார் கோயல் அவர்கள் கூறியிருக்கிறார்.

“முட்டை மாரடைப்பை ஏற்படுத்தும்” – இது ஒரு வதந்தி!

டாக்டர் கோயலின் கூற்றுப்படி,“முட்டையின் மஞ்சள் கருவில் கொழுப்பு (Cholesterol) இருப்பது உண்மைதான், ஆனால் அதனால் இதய நோய் அபாயம் நேரடியாக அதிகரிக்கும் என்பதற்கான அறிவியல் ஆதாரம் இல்லை.”

* உணவில் உள்ள கொழுப்பு (Dietary cholesterol) நம் உடலின் இரத்த கொழுப்பு அளவை (Blood cholesterol) மிகச் சிறிய அளவிலேயே பாதிக்கிறது.

* நம் உடல் இயற்கையாகவே கொழுப்பு உற்பத்தியை சமநிலைப்படுத்துகிறது.

* எனவே, மிதமான அளவில் முட்டை சாப்பிடுவது இதய நோய் அபாயத்தை அதிகரிக்காது.

முட்டை – இதயத்துக்கும் மூளைக்கும் சக்தி

முட்டையில் உள்ள முக்கிய ஊட்டச்சத்துக்கள்:

* புரதம் (Protein) – தசை வளர்ச்சிக்குத் தேவையானது.

* வைட்டமின் A, D, B12 – இதயமும் மூளையும் சீராக இயங்க உதவுகிறது.

* சத்தான கொழுப்பு (Healthy fat) – உடல் சக்தி மற்றும் செல்களின் ஆரோக்கியத்திற்குத் தேவையானது.

“முட்டைகள் இதயத்திற்கும் மூளைக்கும் நன்மை பயக்கும். ஆனால் இதய நோய் அல்லது இரத்த சர்க்கரை (Diabetes) உள்ளவர்கள் முட்டையின் மஞ்சள் கருவை குறைந்த அளவில் மட்டும் உட்கொள்ள வேண்டும்” என்று டாக்டர் கோயல் கூறுகிறார்.

ஆரோக்கியமான இதயத்திற்கு முட்டை சாப்பிடும் சரியான முறை

முட்டையின் நன்மை அதன் சமைக்கும் முறையிலும் உள்ளது. வெண்ணெய் அல்லது எண்ணெயில் பொரித்த முட்டையை விட, வேகவைத்த (Boiled) அல்லது வெந்த முட்டை (Poached) ஆரோக்கியமானது.

இந்த பதிவும் உதவலாம்: நெஞ்செரிச்சலால் அவதியா? இதற்கான சிறந்த மற்றும் மோசமான உணவுகளின் பட்டியல் இதோ.. நிபுணர் தரும் விளக்கம்

முக்கிய குறிப்புகள்

* ஒரு நாளுக்கு ஒரு முழு முட்டை – ஆரோக்கியமானவர்களுக்கு பாதுகாப்பானது.

* இதய நோய் அல்லது சர்க்கரை நோய் உள்ளவர்கள் – வாரத்திற்கு 2-3 முட்டை வரை.

* எண்ணெய், வெண்ணெய், மயோனெய்ஸ் போன்றவற்றுடன் சேர்க்க வேண்டாம்.

* வேகவைத்த முட்டை, முட்டை ஆம்லெட் (குறைந்த எண்ணெயில்) ஆகியவை சிறந்தவை.

மருத்துவர் கூறும் முக்கிய அறிவுரை

“முட்டையின் மஞ்சள் கருவை முழுமையாக தவிர்க்க வேண்டியதில்லை. மிதமாக சாப்பிடுங்கள். உணவில் சமநிலையுடன் சேர்த்தால் இதய நன்மை கிடைக்கும்,” என்கிறார் டாக்டர் கஜிந்தர் குமார் கோயல்.

இறுதியாக..

முட்டைகள் உடலுக்கு முழுமையான ஊட்டச்சத்தைக் கொடுக்கும் ஒரு அருமையான உணவு. மஞ்சள் கருவை முற்றிலும் தவிர்க்க வேண்டியதில்லை; மிதமாக உட்கொண்டால் இதயத்திற்கும் மூளைக்கும் நன்மை தரும். சிறந்த ஆரோக்கியத்திற்காக, வேகவைத்த முட்டைகளை உணவில் சேர்க்கவும். நீங்கள் இதய நோயாளி என்றால், மருத்துவர் ஆலோசனையுடன் முட்டையின் மஞ்சள் கருவை வரையறுக்கவும்.

Disclaimer: இக்கட்டுரை தகவல் மற்றும் கல்வி நோக்கத்திற்காக மட்டுமே. இதய நோய், கொழுப்பு அதிகம், அல்லது இரத்த சர்க்கரை பிரச்சனை உள்ளவர்கள் மருத்துவர் ஆலோசனையுடன் மட்டுமே முட்டை மஞ்சள் கருவை உட்கொள்ள வேண்டும்.