இந்த 4 விஷயம் பண்ணா போதும்.. குடல் ஆரோக்கியம் பெருகும்.!

குடல் (Gut) என்பது நம்முடைய உடலின் இரண்டாவது மூளை என்று அழைக்கப்படுகிறது. செரிமானம் மட்டுமல்லாமல், நோய் எதிர்ப்பு சக்தி, ஹார்மோன் சீராக்கம், உடல் சக்தி ஆகியவற்றுக்கும் குடல் மிக முக்கிய பங்காற்றுகிறது. தவறான உணவுப் பழக்கம் மற்றும் வாழ்க்கை முறை காரணமாக பலருக்கு குடல் பிரச்சினைகள் அதிகரித்து வருகின்றன.

ஹார்வர்ட் மற்றும் ஸ்டான்போர்டில் பயிற்சி பெற்ற குடல்நோய் நிபுணர் டாக்டர் சௌரப் சேதி, குடல் ஆரோக்கியத்தை மேம்படுத்துவதற்கான 4 எளிய வழிகளை இன்ஸ்டாகிராமில் பகிர்ந்துள்ளார்.

குடல் ஆரோக்கியத்தை மேம்படுத்தும் குறிப்புகள்

பிரீபயாட்டிக் உணவுகள் அதிகமாக சாப்பிடுங்கள்

பிரீபயாட்டிக் உணவுகள் என்பது நமது குடலில் உள்ள நல்ல பாக்டீரியாக்களுக்கு உணவாக செயல்படுகின்றன. பூண்டு, வெங்காயம், அஸ்பரகஸ் போன்றவை குடல் பாக்டீரியாவை வளரச்செய்து செரிமானத்தை எளிதாக்குகின்றன.

ப்ரோபயாட்டிக் நிறைந்த உணவுகள் சேர்க்கவும்

ப்ரோபயாட்டிக் உணவுகள் நமது குடலில் நேரடியாக நல்ல பாக்டீரியாவை கூட்டுகின்றன. தயிர், மோர், கெபிர், கொம்புசா, கிம்‌சி, இட்லி போன்றவற்றை சீராக உட்கொண்டால் குடல் சூழல் சீராக இருக்கும்.

அதிக நார்ச்சத்து உள்ள உணவுகள் சாப்பிடுங்கள்

நார்ச்சத்து நிறைந்த உணவு எடுத்துக்கொள்வோர் நீண்ட ஆயுள் வாழ்வார்கள் என்று ஆய்வுகள் கூறுகின்றன. சியா விதை, பெர்ரி, ஓட்ஸ் போன்றவற்றில் நார்ச்சத்து அதிகம். இது செரிமானம் எளிதாகும், மலச்சிக்கல் குறையும், அசிடிட்டி குறையும். தினசரி குறைந்தது 30 கிராம் நார்ச்சத்து சாப்பிட வேண்டும் என மருத்துவர் பரிந்துரைக்கிறார்.

இந்த பதிவும் உதவலாம்: ஓட்ஸ் முதல்.. வாழைப்பூ வரை.. குடல் ஆரோக்கியத்திற்கான நார்ச்சத்து நிறைந்த உணவுகள் இங்கே.. டாக்டர் பால் பரிந்துரை..

தண்ணீர் அதிகமாக குடியுங்கள்

நார்ச்சத்து மற்றும் தண்ணீர் இரண்டும் இணைந்து வேலை செய்கின்றன. நார்ச்சத்து தண்ணீரை உறிஞ்சி செரிமானத்தை சீராக்குகிறது. தினசரி குறைந்தது 8 கண்ணாடி தண்ணீர் குடிக்க வேண்டும். இது குடல் சுகாதாரத்துக்கு அத்தியாவசியம்.

View this post on Instagram

A post shared by Saurabh Sethi MD MPH | Gastroenterologist (@doctor.sethi)

இறுதியாக..

குடல் ஆரோக்கியத்தை பராமரிக்க அதிக சிரமம் தேவையில்லை. பூண்டு, வெங்காயம் போன்ற பிரீபயாட்டிக் உணவுகள், தயிர், இட்லி போன்ற ப்ரோபயாட்டிக் உணவுகள், சியா விதை, ஓட்ஸ் போன்ற நார்ச்சத்து உணவுகள், போதுமான தண்ணீர் குடிக்கும் பழக்கம். இவை நான்கையும் தினசரியில் கடைபிடித்தால் குடல் நோய்கள் தூரமாகும்.

Disclaimer: இந்த கட்டுரை பொதுவான தகவல்களை மட்டுமே வழங்குகிறது. நீண்டநாள் குடல் பிரச்சினைகள், அசிடிட்டி அல்லது செரிமான கோளாறு உள்ளவர்கள் மருத்துவரின் ஆலோசனையை பெறுவது அவசியம்.