என்டோமெட்ரியோசிஸ் ஏற்பட காரணம் என்ன? பெண்கள் தெரிந்து கொள்ள வேண்டிய முக்கிய உண்மை!

பெண்களின் இனப்பெருக்க ஆரோக்கியத்தில் அதிகம் பேசப்படும் ஒரு பிரச்சனை தான் என்டோமெட்ரியோசிஸ் (Endometriosis). இது ஒரு நிலைமையாகும், இதில் கருப்பை உள் அடுக்கு (Endometrium) போலிய திசுக்கள், கருப்பைக்கு வெளியே வளரத் தொடங்குகின்றன.

இதனால் கடுமையான மாதவிடாய் வலி, வயிற்றுவலி, மலச்சிக்கல், கர்ப்பம் அடைய முடியாமை போன்ற பிரச்சனைகள் ஏற்படுகின்றன. ஆனால் இதற்கு தெளிவான காரணம் இன்னும் முழுமையாக கண்டறியப்படவில்லை என்று பிரபல மகளிர் மருத்துவர் டாக்டர் ராஜேஸ்வரி ரெட்டி கூறுகிறார். அவரின் கூற்றுப்படி, மருத்துவர்கள் இதற்கான பல அறிவியல் கருதுகோள்களை (Scientific Theories) முன்வைத்துள்ளனர். அவற்றைப் பற்றி விரிவாகப் பார்ப்போம்.

என்டோமெட்ரியோசிஸ் ஏற்படுவதற்கான காரணங்கள்

ரெட்ரோக்ரேட் மென்ஸ்ட்ரூயேஷன் (Retrograde Menstruation)

இது மிகவும் வலுவான காரணங்களில் ஒன்று என்று டாக்டர் ராஜேஸ்வரி ரெட்டி கூறுகிறார். மாதவிடாய் நேரத்தில் கருப்பையில் இருந்து வெளியேற வேண்டிய இரத்தம், சில சமயங்களில் பெரிட்டோனியல் (pelvic) பகுதிக்குள் பின்னோக்கி செல்லலாம். அந்த இரத்தத்தில் உள்ள என்டோமெட்ரியல் செல்கள் (endometrial cells) கருப்பைக்கு வெளியே ஒட்டிக்கொண்டு வளரத் தொடங்கும். இதுவே என்டோமெட்ரியோசிஸ் உருவாகும் முக்கிய விளக்கம் என பல ஆராய்ச்சிகள் தெரிவிக்கின்றன. ஆனால், எல்லா பெண்களுக்கும் இதே நிகழ்ந்தாலும், சிலருக்கு மட்டுமே இந்த நோய் உருவாகிறது. அதனால் இதனுடன் பிற காரணிகளும் இணைந்திருப்பதாக நிபுணர்கள் கருதுகின்றனர்.

மரபியல் தாக்கம் (Genetic Factors)

மரபியல் காரணம் மிகவும் முக்கியமானதாக கருதப்படுகிறது. ஒரு பெண்ணின் அம்மா அல்லது சகோதரி என்டோமெட்ரியோசிஸ் நோயால் பாதிக்கப்பட்டிருந்தால், அந்த பெண்ணுக்கும் அதே பிரச்சனை ஏற்படும் வாய்ப்பு அதிகம் என டாக்டர் ராஜேஸ்வரி விளக்குகிறார். அதனால், குடும்ப வரலாறு (Family history) இருந்தால், மாதவிடாய் வலி அல்லது கருப்பை சம்பந்தமான பிரச்சனைகள் ஏற்பட்டால், ஆரம்ப கட்டத்திலேயே மருத்துவரை அணுகுவது அவசியம்.

இந்த பதிவும் உதவலாம்: பல பெண்களை பாதிக்கும் எண்டோமெட்ரியோசிஸ்.! இந்த நிலையின் அறிகுறிகள் இங்கே.. மருத்துவர் விளக்கம்..

ஈஸ்ட்ரோஜன் ஹார்மோன் தாக்கம் (Estrogen Dominance)

என்டோமெட்ரியோசிஸ் நோயை ஈஸ்ட்ரோஜன் ஹார்மோன் (Estrogen hormone) அதிகரிப்பு தூண்டும் என்று கூறப்படுகிறது. ஈஸ்ட்ரோஜன் என்பது பெண்களின் கருப்பை உள் அடுக்கை வளர்க்கும் ஹார்மோன் ஆகும். ஆனால் சில பெண்களில் இதன் அளவு இயல்பை விட அதிகமாகும் போது, கருப்பைக்கு வெளியேயும் அதே மாதிரியான திசுக்கள் வளர ஆரம்பிக்கும். இதுவே வலி, அலர்ஜி மற்றும் சுழற்சி பிரச்சனைகளுக்கு வழிவகுக்கிறது. இதனால், ஹார்மோன் சமநிலையை பராமரிப்பது மிகவும் முக்கியம் என நிபுணர்கள் கூறுகின்றனர்.

சுற்றுச்சூழல் மற்றும் அலர்ஜி காரணிகள் (Environmental & Inflammatory Factors)

மருத்துவர் ராஜேஸ்வரி ரெட்டி கூறுவதாவது, சில சுற்றுச்சூழல் நச்சுகள் (Environmental toxins) மற்றும் அழற்சி (Inflammation) காரணிகளும் இந்த நோயை தூண்டக்கூடும். பிளாஸ்டிக் பொருட்களில் உள்ள BPA (Bisphenol-A) போன்ற ரசாயனங்கள் ஹார்மோன் சமநிலையை குலைக்கின்றன. அதேபோல், உடலில் ஏற்படும் தொடர்ச்சியான அழற்சிகள், திசு வளர்ச்சியை ஊக்குவிக்கக்கூடும். இதனால், ஆரோக்கியமான உணவு பழக்கம், தூய்மையான வாழ்க்கை முறை, மற்றும் அழுத்தம் குறைத்தல் ஆகியவை நோயை கட்டுப்படுத்த உதவலாம்.

நோய் எதிர்ப்பு குறைபாடு (Immune System Dysfunction)

சில நிபுணர்கள் இதனை நோய் எதிர்ப்பு மண்டல கோளாறு என்றும் கருதுகின்றனர். உடல் இயல்பாகவே கருப்பைக்கு வெளியே வளர்ந்த திசுக்களை அழிக்க வேண்டும். ஆனால், நோய் எதிர்ப்பு மண்டலம் பலவீனமாக இருந்தால், அந்த திசுக்கள் வளர்ந்து பரவ முடியும். இதனால், உடல் பாதுகாப்பு மண்டலத்தை (Immune system) பலப்படுத்தும் உணவுகள் மற்றும் பழக்கங்கள் முக்கியம்.

View this post on Instagram

A post shared by DrRajeshwari Reddy (@dr.rajeshwarireddy_gynaec)

எப்போது மருத்துவரை அணுக வேண்டும்?

கடுமையான மாதவிடாய் வலி, வயிற்று வலி, அல்லது கர்ப்பம் அடைய முடியாமை போன்ற அறிகுறிகள் இருந்தால், இதை "இயல்பானது" என எண்ணி புறக்கணிக்கக் கூடாது. ஆரம்ப கட்டத்தில் கண்டறிதல் மூலம் இதை கட்டுப்படுத்த முடியும் என டாக்டர் ராஜேஸ்வரி ரெட்டி வலியுறுத்துகிறார்.

இதனைத் தடுக்கும் சிறந்த வழி

* மாதவிடாய் வலியை புறக்கணிக்காமல் மருத்துவரை அணுகுதல்

* ஹார்மோன் சமநிலை பேணுதல்

* ஆரோக்கியமான உணவு மற்றும் உடற்பயிற்சி வழக்கத்தில் கொண்டுவருதல்.

இறுதியாக..

என்டோமெட்ரியோசிஸ் நோயின் சரியான காரணம் இன்னும் கண்டறியப்படவில்லை என்றாலும், மரபியல், ஹார்மோன் மாற்றம், அழற்சி, மற்றும் சுற்றுச்சூழல் தாக்கம் ஆகியவை முக்கிய பங்கு வகிக்கின்றன.

Disclaimer: இந்தக் கட்டுரை பொது தகவலுக்காக மட்டுமே. இதில் கூறியவற்றை மருத்துவ ஆலோசனையாக எடுத்துக்கொள்ளக் கூடாது. உங்களுக்கு என்டோமெட்ரியோசிஸ் அறிகுறிகள் இருந்தால், தகுந்த மகளிர் நிபுணர் (Gynecologist) ஆலோசனையை பெறவும்.