சாப்பிடும்போது செய்யும் இந்த 7 தவறுகள் உங்கள் செரிமானத்தை சீர்குலைக்கும்.! மருத்துவர் எச்சரிக்கை

நம்மில் பலர் ஆரோக்கியமான உணவைத் தேர்ந்தெடுப்பதன் மூலமே நல்ல செரிமானம் கிடைக்கும் என்று நம்புகிறோம். ஆனால் உண்மையில் சாப்பிடும் முறை அதைவிட முக்கியமானது என்று நிபுணர்கள் கூறுகிறார்கள். ஹைதராபாத்தில் உள்ள யசோதா மருத்துவமனையின் மூத்த இரைப்பை, குடல் மற்றும் கல்லீரல் நிபுணர் டாக்டர் கே.எஸ். சோமசேகர் ராவ் கூறுகையில், “சரியான உணவு நேரம், அளவு, மெல்லும் முறை ஆகியவை செரிமான அமைப்பை நேரடியாகப் பாதிக்கின்றன. சிறிய தவறுகளும் வாயு, வீக்கம், அமிலத்தன்மை, அஜீரணம் போன்ற பிரச்சனைகளை ஏற்படுத்தும்,” என்கிறார். அவரின் விளக்கத்தின்படி, பலர் அறியாமலே செய்யும் 7 உணவு தவறுகள் மற்றும் அவற்றின் விளைவுகளை பார்ப்போம்.

சாப்பிடும்போது செய்யும் தவறுகள்

1. மிக வேகமாக சாப்பிடுதல்

சாப்பிடும் போது உணவை வேகமாக விழுங்குவது மிகப் பெரிய பிழை. மெல்லாமல் சாப்பிடுவதால் உணவு பெரிய துண்டுகளாக வயிற்றுக்குள் செல்கிறது. இது குடலுக்கு அதிக சுமையை ஏற்படுத்தி வாயு, வீக்கம், அமிலத்தன்மை போன்ற பிரச்சனைகளை ஏற்படுத்தும். “உணவை நிதானமாக மெல்லும்போது உமிழ்நீரில் உள்ள நொதிகள் செரிமானத்தைத் தொடங்கும்,” என்கிறார் டாக்டர் சோமசேகர் ராவ்.

2. அதிகமாக சாப்பிடுதல்

“ஒரே நேரத்தில் அதிக உணவை உட்கொள்வது வயிற்றின் திறனை மீறி அழுத்தத்தை ஏற்படுத்துகிறது. இதனால் உணவு முறையாக ஜீரணிக்காது,” என நிபுணர் கூறுகிறார். இது அமிலத்தன்மை, கனத்த உணர்வு, அஜீரணம் போன்ற பிரச்சனைகளுக்குக் காரணமாகிறது. நாள் முழுவதும் சிறு அளவுகளில் பல முறை உணவு உட்கொள்வது சிறந்தது.

3. ஒழுங்கற்ற உணவு நேரம்

சில நேரங்களில் மிகவும் தாமதமாக சாப்பிடுவதோ, அல்லது ஒரு நேரத்தைத் தவிர்ப்பதோ செரிமான சுழற்சியை குலைக்கும். நிரந்தரமான நேரத்தில் உணவு உட்கொள்வது, செரிமான நொதிகளின் சுரப்பையும் குடல் இயக்கத்தையும் சரியாக வைத்திருக்க உதவும். “சமமான உணவு நேரம் உடலின் ‘biological clock’-ஐ கட்டுப்படுத்த உதவுகிறது,” என்கிறார் மருத்துவர்.

இந்த பதிவும் உதவலாம்: 7 நாள்கள்.. 7 பானங்கள்! குடல் ஆரோக்கியம் மட்டுமல்ல, வீக்கத்திற்கும் பாய் சொல்லுங்க..

4. அதிக குப்பை மற்றும் பதப்படுத்தப்பட்ட உணவு

பேக்கேஜ் செய்யப்பட்ட உணவுகள், குப்பை உணவுகள் செரிமானத்தின் எதிரிகள். இவை நார்ச்சத்து குறைவாகவும், இரசாயனப் பொருட்கள் அதிகமாகவும் இருப்பதால் குடலின் நலனைக் குறைக்கும். இவை நமது நல்ல பாக்டீரியா சமநிலையை (gut flora) பாதித்து, செரிமானத்தை மெதுவாக்கி வீக்கம் மற்றும் வாயுவை ஏற்படுத்துகின்றன.

5. தண்ணீர் குடிக்கும் தவறான நேரம்

உணவுக்கு முன் அல்லது சாப்பிடும் போதே அதிக தண்ணீர் குடிப்பது தவறு. இது செரிமான சாறுகளை நீர்த்துப்போகச் செய்து, நொதிகளின் செயல்பாட்டை குறைக்கிறது. சரியான முறை, உணவுக்கு 15–20 நிமிடம் முன் தண்ணீர் குடிக்கலாம். உணவுக்குப் பிறகு 30 நிமிடம் கழித்து தண்ணீர் குடிப்பது சிறந்தது.

6. சிந்தனையற்ற (Mindless) உணவு

மொபைல் பார்க்கும் போது, டிவி பார்ப்பது அல்லது வேறு வேலை செய்வது சாப்பிடும் பொழுது செரிமானத்தைக் குறைக்கிறது. மனம் உணவில் கவனம் செலுத்தாததால், உடல் செரிமான சாறுகளை சுரக்காது. கவனத்துடன், அமைதியாக சாப்பிடும் பழக்கம் செரிமானத்தை மேம்படுத்தும்.

7. உணவு ஒவ்வாமையை புறக்கணித்தல்

சில உணவுகளை சாப்பிட்ட பிறகு வீக்கம், எரிச்சல் அல்லது வலி ஏற்பட்டால், அது உணவு சகிப்புத்தன்மையின்மை (Food Intolerance) ஆக இருக்கலாம். இதை அலட்சியம் செய்யாமல் மருத்துவரின் ஆலோசனையுடன் அந்த உணவைத் தவிர்ப்பது முக்கியம்.

இறுதியாக..

சரியான உணவு பழக்கங்கள் செரிமானத்தை சீராக்கி, உடல் நலத்தை மேம்படுத்தும். நிதானமாக சாப்பிடுதல், சரியான நேரம் பின்பற்றுதல், தண்ணீர் குடிக்கும் நேரம் கவனித்தல், குப்பை உணவைத் தவிர்த்தல் போன்ற சிறிய மாற்றங்கள் பெரிய ஆரோக்கிய பலன்களை தரும்.

Disclaimer: இந்தக் கட்டுரை மருத்துவ நிபுணர் டாக்டர் கே.எஸ். சோமசேகர் ராவ் அவர்களின் பொதுவான ஆரோக்கிய ஆலோசனையின் அடிப்படையில் உருவாக்கப்பட்டது. இதில் கூறப்பட்டுள்ள தகவல்கள் கல்வி நோக்கத்திற்காக மட்டுமே. எந்தவொரு மருத்துவ முடிவும் மருத்துவரின் ஆலோசனையுடன் மட்டுமே எடுக்கப்பட வேண்டும்.