இளவயதில் நரைமுடியா? கவலை வேண்டாம்.. வீட்டிலேயே தீர்வு உள்ளது..

கூந்தல் என்றாலே கருமை நிறம் தான் நினைவுக்கு வரும். ஆனால் இளம் வயதிலேயே முடி நரைக்கத் தொடங்கினால் அது ஒருவரின் தோற்றத்தையும் மனநிலையையும் பெரிதும் பாதிக்கிறது. இளவயதில் ஏற்படும் நரைமுடி, ஒருவரை வயதானவராக காட்டுவதுடன் மன உளைச்சலையும் உருவாக்குகிறது. இதனை ‘இளநரை’ என அழைக்கிறோம்.

இளநரைக்கு காரணங்கள் என்ன?

சித்த மருத்துவர் எஸ். காமராஜ் கூறுகையில், இளநரை ஏற்படுவதற்கு முக்கிய காரணங்களாக

• இரும்புச்சத்து குறைபாடு
• வைட்டமின் மற்றும் புரதச் சத்து குறைவு
• மன அழுத்தம், கவலை
• தவறான உணவுப் பழக்கம்
• முறையற்ற வாழ்க்கை முறை

ஆகியவை இருக்கலாம் என விளக்குகிறார்.

இந்த பதிவும் உதவலாம்: 5 நிமிடங்களில் முடி உதிர்வை நிறுத்த உதவும் சூப்பர் டிப்ஸ் இதோ.. அறிவியல் தரும் குறிப்புகள்

இளநரை தவிர்க்க இயற்கை வழிகள்

இளநரை என்பது தவிர்க்க முடியாத பிரச்சனை அல்ல. சிறிது கவனம் மற்றும் தொடர்ச்சியான பழக்கம் இருந்தால், வீட்டிலேயே கிடைக்கும் இயற்கை பொருட்கள் மூலம் இதை கட்டுக்குள் கொண்டு வர முடியும் என்கிறார் மருத்துவர்.

வெந்தயம் – கூந்தலுக்கு உயிர்

வெந்தயம் கூந்தல் வளர்ச்சி மற்றும் பளபளப்பிற்கு மிகச்சிறந்தது.
எடுத்துக்கொள்ளும் முறை:

• வெந்தயத்தை முளைகட்டி நிழலில் உலர்த்தி அரைத்து பொடி செய்து வைத்துக்கொள்ளவும்.
• தினமும் ஒரு முறை பால் அல்லது தேனில் கலந்து சாப்பிடலாம்
• தொடர்ந்து எடுத்தால் இளநரை குறையும்.

பாசிப்பயறு – புரதச் சத்து நிறைந்தது

பாசிப்பயறு உடலை குளிர்ச்சியாக வைத்திருக்கும் தன்மை கொண்டது.
முறை:

• பாசிப்பயறை முளைகட்டி உலர்த்தி பொடி செய்து தினமும் ஒரு டீஸ்பூன் பால் அல்லது தேனில் கலந்து சாப்பிடலாம்.
• இது இளநரையை மெதுவாக குறைக்க உதவும்.

View this post on Instagram

A post shared by Dr S Kamaraj BSMS, DIP in Yoga (@drskamaraj)

நெல்லிக்காய் – கூந்தலின் பாதுகாவலன்

நெல்லிக்காய் முடி ஆரோக்கியத்திற்கு முக்கியமானது.
முறை:

• கொட்டை நீக்கி துண்டாக்கி, நிழலில் நன்றாக உலர்த்தி அரைத்து பொடி செய்யவும். 
• தினமும் 5 கிராம் அளவு தேன் அல்லது வெந்நீரில் கலந்து எடுத்துக்கொள்ளலாம்
• ஒரு மண்டலத்தில் நல்ல பலன் கிடைக்கும்.

கறிவேப்பிலை – கருமை நிறத்தின் ரகசியம்

கறிவேப்பிலை முடியை கருமையாக வைத்திருக்க உதவும் அற்புத மூலிகை.
முறை:

• காம்பு நீக்கி, உலர்த்தி பொடி செய்து தேன் அல்லது வெந்நீரில் கலந்து சாப்பிடலாம்.
• தொடர்ந்து எடுத்தால் நரைமுடி குறையும்.

முருங்கைக்கீரை – ஊட்டச்சத்து களஞ்சியம்

முருங்கைக்கீரை உடலுக்கு மட்டுமல்ல, கூந்தலுக்கும் அருமையானது.
முறை:

• நிழலில் உலர்த்தி, பொடி செய்து தினமும் ஒரு வேளை தேனில் கலந்து எடுத்துக்கொள்ளலாம்
• கரிசலாங்கண்ணி கீரையையும் இதே போல் பயன்படுத்தலாம்.

எப்படி எடுத்தால் சிறந்த பலன்?

வெந்தயம், பாசிப்பயறு, நெல்லிக்காய், கறிவேப்பிலை, முருங்கைக்கீரை ஆகியவற்றை தினமும் ஒன்றாக மாற்றி மாற்றி எடுத்தால் இளநரை பிரச்சனை கட்டுக்குள் வரும்.
ஒரு மண்டலம் முதல் 3–6 மாதங்கள் வரை தொடர்ந்து எடுத்தால் நல்ல மாற்றம் காணலாம் என சித்த மருத்துவர் தெரிவிக்கிறார்.

இறுதியாக..

இளநரை என்பது இன்றைய இளம் தலைமுறையினரிடையே அதிகரித்து வரும் பிரச்சனை. ஆனால் சரியான உணவுப் பழக்கம், இயற்கை மூலிகைகள் மற்றும் தொடர்ச்சியான பராமரிப்பு இருந்தால், இளநரையை கட்டுப்படுத்தவும், இயற்கையாக கூந்தலின் கருமையை பாதுகாக்கவும் முடியும்.

பொறுப்பு துறப்பு: இந்தக் கட்டுரையில் வழங்கப்பட்ட தகவல்கள் பொதுத் தகவல்களுக்காக மட்டுமே. இது மருத்துவ ஆலோசனைக்கு மாற்றாகாது. இக்குறிப்புகளை பின்பற்றும் முன், மருத்துவர் அல்லது சித்த மருத்துவ நிபுணரை அணுகுவது அவசியம். இங்கு வழங்கப்பட்ட தகவல்களின் துல்லியத்திற்கான முழுப் பொறுப்பை சமயம் தமிழ் ஏற்காது.