குழந்தைகளில் இரத்தச் சர்க்கரைக் குறைவு ஏற்படுவதற்கான பொதுவான காரணங்கள் என்னென்ன தெரியுமா?

What causes low blood sugar in children and how to prevent it: இன்றைய நவீன காலகட்டத்தில் மோசமான வாழ்க்கை முறை மற்றும் ஆரோக்கியமற்ற உணவுமுறை காரணமாக பெரியவர்களுடன் சேர்ந்து, குழந்தைகளும் சிறு வயதிலேயே பல உடல்நலப் பிரச்சினைகளை எதிர்கொள்கின்றனர். இதில் குழந்தைகளிடையே உயர் இரத்த அழுத்தம், குறைந்த இரத்த அழுத்தம், நீரிழிவு போன்ற நோய்கள் ஏற்படுவது மிகவும் பொதுவானதாக மாறிவிட்டது. இந்நிலையில், சில குழந்தைகளில் குறைந்த இரத்த சர்க்கரை அளவு பிரச்சினையும் ஏற்படுகிறது. பொதுவாக, இரத்த சர்க்கரை அளவு குறைவது ஹைபோகிளைசீமியா என அழைக்கப்படுகிறது. இது ஒரு கடுமையான உடல்நலப் பிரச்சினையாகக் கருதப்படுகிறது.

குழந்தைகளின் உடலில் குளுக்கோஸ் அளவு மிகவும் குறைவாக இருப்பதால் இந்த பிரச்சனை ஏற்படுகிறது. உடலில் இரத்த சர்க்கரை அளவு குறைவதால் உடலில் ஆற்றல் பற்றாக்குறை பிரச்சனை ஏற்படுகிறது. இது குழந்தைகளுக்கு மட்டுமல்ல, பெரியவர்களுக்கும் ஆபத்தான ஒரு உடல்நலப் பிரச்சனையாகும். இந்நிலையில், குழந்தைகளில் குறைந்த இரத்த சர்க்கரை ஏற்படுவதற்கான காரணங்கள் என்னென்ன என்பது குறித்து ஜெய்ப்பூரில் உள்ள நாராயண மருத்துவமனையின் மூத்த ஆலோசகர் - குழந்தை மருத்துவ மற்றும் நியோனாட்டாலஜிஸ்ட் டாக்டர் ராஜேஷ் பதக் அவர்கள் சில தகவல்களைப் பகிர்ந்துள்ளார்.

இந்த பதிவும் உதவலாம்: Low Blood Sugar: இரத்த சர்க்கரை அளவு குறைந்தால் தலை சுற்றல் வருமா?

குழந்தைகளில் இரத்த சர்க்கரைக் குறைவதற்கான காரணங்கள்

குழந்தைகளில் இரத்த சர்க்கரை குறைவு ஏற்படுவது ஒரு கடுமையான பிரச்சனையாகக் கருதப்படுகிறது. இதற்குப் பின்னால் பல்வேறு காரணங்கள் உள்ளது. அவற்றைப் பற்றி இங்குக் காண்போம்.

அதிக இன்சுலின் அல்லது தவறான அளவை எடுத்துக்கொள்வது

பொதுவாக, நீரிழிவு நோயால் பாதிக்கப்பட்ட குழந்தைகளுக்கு இன்சுலின் கொடுக்கப்படுகிறது. இதனால் இன்சுலின் கொடுப்பது அவர்களின் இரத்த சர்க்கரை அளவை கட்டுக்குள் வைத்திருக்கும். ஆனால் குழந்தைக்கு தேவைக்கு அதிகமாக இன்சுலின் கொடுக்கப்படும் போதோ அல்லது சரியான நேரத்தில் உணவு கிடைக்கவில்லை என்றாலோ, அது இரத்த சர்க்கரை அளவை வெகுவாகக் குறைக்கக்கூடும். குழந்தையின் உடலின் செல்கள் குளுக்கோஸை உறிஞ்சுவதற்கு இன்சுலின் உதவுகிறது. மேலும் இது அதிகமாக இருக்கும்போது, இரத்தத்தில் உள்ள குளுக்கோஸின் அளவு மிகவும் குறைகிறது.

உணவில் போதுமான கார்போஹைட்ரேட்டுகளை எடுத்துக்கொள்ளாமல் இருப்பது

குழந்தைகளின் உடல் வளர்ச்சிக்கு அதிக ஆற்றல் தேவைப்படுகிறது. எனவே, அவர்கள் உணவின் மூலம் குறிப்பாக, காலை உணவில் போதுமான அளவு கார்போஹைட்ரேட்டுகளைச் சேர்க்க வேண்டும். ஆனால், இவ்வாறு போதுமான கார்போஹைட்ரேட்டுகளை எடுத்துக் கொள்ளமால் இருக்கும் போது, அவர்களின் உடலுக்கு போதுமான குளுக்கோஸ் கிடைக்காது. நமது உடலுக்குத் தேவையான அவசியமான ஊட்டச்சத்துக்களில் கார்போஹைட்ரேட்டுகளும் அடங்குகிறது. ஏனெனில், இதிலிருந்தே உடல் குளுக்கோஸை உருவாக்குகிறது. எனவே, குழந்தைக்கு போதுமான ஊட்டச்சத்துக்கள் கிடைக்கவில்லை என்றால், உணவைத் தவிர்த்தால் அல்லது சரியாக சாப்பிடவில்லை என்றால், இரத்த சர்க்கரை அளவு குறையலாம்.

உடல்நிலை சரியில்லாமல் இருப்பது மற்றும் வாந்தி எடுப்பது

சில சமயங்களில் குழந்தைகள் மிகவும் உடல்நிலை சரியில்லாமல், உணவு சாப்பிட்ட உடனேயே வாந்தி எடுப்பர். இதனால், உடலில் பலவீனம் ஏற்படும். இந்நிலையில், உடலில் குளுக்கோஸ் குறைவதற்கு வழிவகுக்கும். இவை இரத்த சர்க்கரை குறைவதற்கும் காரணமாக அமைகிறது.

கல்லீரல் அல்லது சிறுநீரகம் தொடர்பான நோய்கள்

கல்லீரல் தொடர்பான பிரச்சனைகளான ஹெபடைடிஸ் அல்லது சிறுநீரகம் தொடர்பான உடல்நலப் பிரச்சினைகள் போன்றவை குழந்தைகளுக்கு ஏற்பட வாய்ப்புள்ளது. இவை இரண்டுமே, குளுக்கோஸ் குறைபாட்டை ஏற்படுத்தக்கூடியதாகும். ஏனெனில், சிறுநீரகம் மற்றும் கல்லீரல் ஆகிய இரு உறுப்புகளுமே உடலின் குளுக்கோஸை சேமித்து பயன்படுத்தும் திறனைப் பாதிப்பதால் இது நிகழலாம். எனவே, கல்லீரல் மற்றும் சிறுநீரகப் பிரச்சினைகள் உடலில் இரத்த சர்க்கரை அளவைக் குறைக்கிறது.

இந்த பதிவும் உதவலாம்: நீரிழிவு நோயாளிகள் முருங்கை சாப்பிடலாமா? அப்படினா இந்த விளைவுகளையும் சந்திக்க தயாராகிக்கோங்க

அதிக உடல் செயல்பாடுகளைச் செய்வது

குழந்தை அதிக உடல் செயல்பாடுகளைச் செய்யும் போது, அவர்களது உடல் அதிக சக்தியைச் செலவிடுகிறது. உடல் இந்த சக்தியை குளுக்கோஸிலிருந்து பெறுகிறது. மேலும் உடல் இதை அதிகமாகப் பயன்படுத்துவது இரத்த சர்க்கரை அளவைக் குறைகிறது. எனவே, சுறுசுறுப்பான குழந்தைகளின் உணவில் ஊட்டச்சத்து நிறைந்த உணவுகளைச் சேர்ப்பது மிகவும் முக்கியமாகும். இது அவர்களின் உடலின் ஆற்றலை அதிகரிக்க உதவுகிறது.

நீண்ட நேரம் பசியுடன் இருப்பது

குழந்தை மணிக்கணக்கில் எதையும் சாப்பிடாமல் இருந்தாலோ அல்லது ஏதேனும் காரணத்திற்காக உண்ணாவிரதம் இருந்தாலோ, அவரது உடலில் குளுக்கோஸ் பற்றாக்குறை ஏற்படுகிறது. இவ்வாறு நீண்ட நேரம் சாப்பிடாமல் இருப்பதால், கல்லீரலில் கிளைகோஜன் குவிவது நின்றுவிடுகிறது. இதன் காரணமாக உடலில் குளுக்கோஸ் குறைவாக உற்பத்தியாகிறது. இதனால், இரத்தத்தில் சர்க்கரை அளவு குறையக்கூடும்.

ஹார்மோன்கள் பற்றாக்குறை

குழந்தைகளில் பிட்யூட்டரி மற்றும் அட்ரீனல் சுரப்பிகள் இரத்த சர்க்கரையை கட்டுப்படுத்த உதவும் அத்தியாவசிய ஹார்மோன்களை உற்பத்தி செய்கிறது. எனவே, இந்த சுரப்பிகளில் ஏதேனும் ஒன்று சரியாக செயல்படவில்லை எனில், குழந்தைகளின் உடலில் ஹார்மோன் குறைபாடுகள் இருக்கலாம். இவை இரத்த சர்க்கரை அளவைக் குறைக்க வழிவகுக்கிறது.

முடிவுரை

குழந்தைகளில் இரத்த சர்க்கரை குறைவதற்கு பல்வேறு காரணங்கள் இருக்கலாம். அவற்றில் சாப்பிடாமல் இருப்பது, ஊட்டச்சத்துக்கள் இல்லாதது போன்றவை அடங்கும். எனவே, குழந்தை சோம்பல், தலைச்சுற்றல், வியர்வை, குழப்பம் அல்லது மயக்கம் போன்ற அறிகுறிகளைச் சந்தித்தால், உடனடியாக குழந்தைகளை மருத்துவரிடம் பரிசோதனை செய்வது அவசியமாகும்.

இந்த பதிவும் உதவலாம்: திடீரென இரத்த சர்க்கரை குறையறது சர்க்கரை லெவல் அதிகமாவதை விட ஆபத்தாம்.. எதனால் தெரியுமா?

Image Source: Freepik