உணவுப் பழக்கத்திற்கும் வறண்ட சருமத்திற்கும் உள்ள வலுவான தொடர்பு – நிபுணர் விளக்கம்!

சிலருக்கு சருமம் மென்மையாக, சிலருக்கு எண்ணெய் பசையாக, சிலருக்கு வறண்டதாக இருக்கும். ஆனால், பலர் வறண்ட சருமத்திலிருந்து விடுபட பல்வேறு பராமரிப்பு கிரீம்கள், சீரம்கள் பயன்படுத்தினாலும், மாற்றம் காணப்படாது. இதற்குக் காரணம் உங்கள் உணவுப் பழக்கங்கள் கூடாக இருக்கலாம் என நிபுணர்கள் தெரிவிக்கின்றனர். இதுகுறித்து புது தில்லி எலாண்டிஸ் ஹெல்த்கேர் தோல் மருத்துவர் டாக்டர் சாந்தனி ஜெயின் குப்தா (MBBS, MD) அவர்கள் விளக்கமளித்துள்ளார்.

உணவு மற்றும் வறண்ட சருமம் – அறிவியல் விளக்கம்

NCBI நிறுவனம் மேற்கொண்ட ஆய்வின்படி, முழு உணவுகளில் (Whole foods) காணப்படும் ஆக்ஸிஜனேற்றிகள், நார்ச்சத்து, பைட்டோநியூட்ரியண்ட்கள் போன்றவை சரும ஆரோக்கியத்தை மேம்படுத்துகின்றன. இவை சரும வீக்கம், அரிப்பு, தோல் அழற்சி போன்ற பிரச்சினைகளை குறைக்கும்.

மேலும், சொரியாசிஸ் (Psoriasis), அலோபீசியா (Alopecia), விட்டிலிகோ (Vitiligo) போன்ற தோல் நோய்களில் உணவுமுறை மாற்றங்கள் நல்ல பலனை தரக்கூடும் என ஆராய்ச்சியில் கூறப்பட்டுள்ளது.

சரியான உணவுமுறை சருமத்திற்கு தரும் நன்மைகள்

டாக்டர் சாந்தனி ஜெயின் குப்தாவின் கூற்றுப்படி, “உணவின் தரம் உங்கள் சருமத்தின் நீர்சத்து மற்றும் மென்மையைக் குறிக்கிறது. நம்முடைய பளபளப்பான சருமம் நம் குடல் ஆரோக்கியத்துடனும் நேரடியாக சம்பந்தப்பட்டிருக்கும்,” என்கிறார். அவரின் பரிந்துரைகள்:

1. ஒமேகா–3 கொழுப்பு அமிலங்கள்:

மீன், வால்நட், ஆளி விதைகள் போன்ற உணவுகளில் காணப்படும் ஒமேகா–3 அமிலங்கள் சருமத்தை உள்ளிருந்து நீரேற்றமாக வைத்திருக்க உதவுகின்றன.

2. ஆக்ஸிஜனேற்றிகள் (Antioxidants):

பழங்கள், காய்கறிகள், கொட்டைகள் போன்ற உணவுகள் சரும செல்களை ஆக்ஸிஜனேற்ற அழுத்தத்திலிருந்து காக்கும். இது வயதான தோற்றத்தையும் தடுக்கிறது.

3. நீரேற்றம்:

போதுமான அளவு தண்ணீர் குடிப்பது, தர்பூசணி, வெள்ளரிக்காய் போன்ற நீர்ச்சத்து நிறைந்த பழங்களை உட்கொள்வது சருமத்தின் ஈரப்பதத்தைப் பேணுகிறது.

4. வைட்டமின் D:

வைட்டமின் D குறைபாடு சரும வறட்சிக்கு வழிவகுக்கும். முட்டை, மீன், சூரிய வெளிச்சம் போன்றவை இதனை நிறைவேற்ற உதவும்.

5. துத்தநாகம் (Zinc):

துத்தநாகம் நிறைந்த கடல் உணவுகள், முந்திரி போன்றவை புதிய சரும செல்கள் உருவாவதில் உதவி செய்கின்றன.

இந்த பதிவும் உதவலாம்: எந்த பிரச்சனையும் இல்லாத பொலிவான, பளபளப்பான சருமத்திற்கு தினசரி பழக்கங்கள் இதோ

ஆரோக்கியமற்ற உணவுகள் தரும் தீமைகள்

டாக்டர் சாந்தனி விளக்குகையில், “சர்க்கரை மற்றும் பதப்படுத்தப்பட்ட உணவுகள் (Processed foods) உடலில் வீக்கம் மற்றும் ஹார்மோன் சீர்கேட்டை ஏற்படுத்துகின்றன. இதனால் சருமத்தின் இயல்பான ஈரப்பதம் குறைந்து வறண்ட தன்மை அதிகரிக்கும்,” என்கிறார். அதாவது, சோடா, பேக்கரி பொருட்கள், அதிக சர்க்கரை கொண்ட பானங்கள் போன்றவற்றை அடிக்கடி உட்கொள்வது உங்கள் சருமத்தை வறண்டதாக்கும்.

வறண்ட சருமத்தை சரி செய்ய உதவும் உணவுமுறை குறிப்புகள்

* தினசரி குறைந்தது 2–3 லிட்டர் தண்ணீர் குடிக்கவும்.

* சத்து நிறைந்த உணவு – பழங்கள், காய்கறிகள், விதைகள், கொட்டைகள் சேர்க்கவும்.

* சூரிய வெளிச்சம் (Sunlight) பெறுவதன் மூலம் வைட்டமின் D உற்பத்தி சீராகும்.

* அதிக மதுவும் காஃபினும் குறைக்கவும் – இது உடல் நீரை குறைக்கிறது.

* சீரான தூக்கமும் மனஅழுத்த கட்டுப்பாடும் சருமத்தின் மீட்பை மேம்படுத்தும்.

இறுதியாக..

உணவு மற்றும் சருமம் இடையே நேரடி தொடர்பு உள்ளது. வறண்ட சருமத்தை சரி செய்ய விலையுயர்ந்த கிரீம்கள் போதாது. அதற்கான தீர்வு உங்கள் தட்டில் உள்ளது. ஆரோக்கியமான, சத்து நிறைந்த உணவுகளை உட்கொள்வதன் மூலம் உள் ஆரோக்கியமும் பளபளப்பான சருமமும் பெற முடியும்.

Disclaimer: இந்த கட்டுரை மருத்துவ ஆலோசனையாக கருதப்படக் கூடாது. சரும வறட்சியோ அல்லது அலர்ஜி பிரச்சனையோ இருந்தால், தயவுசெய்து தோல் நிபுணரை (Dermatologist) அணுகுங்கள்.