Vegan Diet: வீகன் டயட் இருக்கீங்களா?… நீங்கள் சாப்பிட வேண்டிய புரத உணவுகள் எவை?

$

வீகன் டயட் முறையை பின்பற்றுவோருக்கு மிகவும் குறைந்த அளவிலான புரோட்டீன் ஆதாரங்களே கிடைக்கின்றன. எனவே புரோட்டீன் நிறைந்த சிறப்பான உணவுகள் குறித்து அறிந்து கொள்ளுங்கள்…

சமச்சீர் உணவு என்று வரும்போது புரதம் மிகவும் முக்கியமானது. நம் உடலில் உள்ள ஒவ்வொரு செல்லிலும் புரதம் உள்ளது. செல்களை சரிசெய்யவும் புதியவற்றை உருவாக்கவும் உங்கள் உணவில் புரதம் தேவை. குழந்தைகள், இளம் பருவத்தினர் மற்றும் கர்ப்பிணிப் பெண்களின் வளர்ச்சி மற்றும் வளர்ச்சிக்கு புரதம் மிக முக்கியமான ஊட்டச்சத்து ஆகும்.

இதையும் படிங்க: Food After Miscarriage: அபார்ஷனுக்குப் பிறகு ஆரோக்கியம் பெற இதை கட்டாயம் சாப்பிடுங்கள்!

இறைச்சி உண்பவர்களுக்கு புரோட்டீன் எளிதில் கிடைக்கிறது. ஆனால் நம்மில் பலர் சைவ உணவு உண்பவர்கள். குறைந்த பட்சம் முட்டை கூட சாப்பிடாதவர்களும் உண்டு. அதாவது வீகன் டயட் முறையை பின்பற்றுவோர் இறைச்சி, முட்டை, பால் மற்றும் பால் சார்ந்த பொருட்களான பனீர், தயிர், சீஸ், நெய் போன்ற விலங்குகளிடம் இருந்து கிடைக்கக்கூடிய உணவுகளை கூட தவிர்த்துவிட்டு, அதிதீவிரமான சைவ உணவுகளை மட்டுமே உட்கொள்வார்கள்.

வீகன் டயட் இருப்பவர்களுக்கான சிறந்த புரதச்சத்து ஆதாரங்கள் நிறைந்த உணவுகள் இதோ….

சோயா பீன்ஸ்:

சோயா பீன்ஸ் தாவர அடிப்படைலான புரதத்தின் சிறந்த மூலமாகும். USDA படி, 100 கிராம் சோயாபீன்களில் 36 கிராம் புரதம் உள்ளது. முட்டைக்கு மாற்றாக இதை எடுத்துக் கொள்ளலாம். வாரம் ஒருமுறை சோயா பீன்ஸ் அல்லது சோயா பால் குடிப்பதால் உடலுக்குத் தேவையான புரதச்சத்து கிடைக்கும்.

பீன்ஸ்:

பீன்ஸ் சைவ புரதத்தின் சிறந்த மூலமாகும். இரவில் ஊறவைத்து, காலையில் உணவாக சாப்பிடுவது நல்ல ஆரோக்கிய நன்மைகள் மற்றும் வலிமை தருகிறது. வெள்ளை பீன்ஸ் மூலம் பலவிதமான சுவையான உணவுகளையும் செய்யலாம். 100 கிராம் வேகவைத்த கொண்டைக்கடலையில் சுமார் 19 கிராம் புரதம் உள்ளது.

கோதுமை மாவு:

கோதுமை மாவில் புரதம் நிறைந்துள்ளது. இந்த சூப்பர்ஃபுட் ரொட்டி, தோசை உள்ளிட்ட பல்வேறு உணவுகளை தயாரிக்க பயன்படுகிறது. 100 கிராம் சமைத்த கோதுமையில் 13.2 கிராம் புரதம் உள்ளது.

இதையும் படிங்க: Winter Food for Weight Loss:குளிர் காலத்தில் ஜிம்முக்கு போகாமலேயே உடல் எடையை குறைக்கனுமா? -இதை சாப்பிடுங்கள்!

சியா சீட்ஸ்:

பார்க்க கடுகு போல சிறியதாக இருக்கும் சியா விதைகளில், ஏராளமான ஊட்டச்சத்துக்கள் நிரம்பியுள்ளன. ஆக்ஸிஜனேற்றிகள் மற்றும் ஒமேகா -3 ஆகியவற்றைக் கொண்டுள்ளன. அவற்றில் போதுமான புரதமும் உள்ளது. 100 கிராம் சியா விதைகளில் 17 கிராம் புரதம் உள்ளது.

பருப்பு வகைகள்:

பருப்பு வகைகள் புரதத்தின் சிறந்த ஆதாரங்களாகும். இந்த பருப்புகளை சமைப்பதற்கு முன் ஊறவைக்க வேண்டும். அதன் பிறகு சமைத்து சாப்பிட்டால் அதிக சத்துக்கள் கிடைக்கும். மேலும் 1 கப் பருப்பில் சுமார் 18 கிராம் புரதம் உள்ளது.

பச்சை பட்டாணி:

சமைத்த ஒரு கோப்பை பச்சைப் பட்டாணியில் 9 கிராம் புரதம் உள்ளது. மேலும் இதில் நார்ச்சத்து, தியாமின், ஃபோலேட், மெக்னீசியம், வைட்டமின் ஏ,சி, கே ஆகியவை உள்ளன.

நட்ஸ் வகைகள்:

பாதாம், முந்திரி, பிஸ்தா உள்ளிட்ட நட்ஸ் வகைகளில் இரும்பு, கால்சியம், மெக்னீசியம், செலினியம், பாஸ்பரஸ், வைட்டமின் ஈ மற்றும் சில பி வைட்டமின்களுடன் நார்ச்சத்து மற்றும் ஆரோக்கியமான கொழுப்புகள் நிறைந்துள்ளன.