சரியான நேரத்தில் உடற்பயிற்சி செய்தால் நீரிழிவு கட்டுப்பாட்டில்! – மருத்துவர் அறிவுறுத்தல்

நீரிழிவு நோய் (Diabetes) என்பது உடலின் இன்சுலின் சுரப்பும், அதன் செயல்பாடும் பாதிக்கும் வளர்சிதை மாற்றக் கோளாறு. இதனால் இரத்தத்தில் சர்க்கரை அளவு அதிகரிக்கிறது. இதை கட்டுப்படுத்த மருந்துகளோடு ஆரோக்கியமான உணவு பழக்கம் மற்றும் உடற்பயிற்சி அவசியம்.

உடற்பயிற்சி இரத்த சர்க்கரை அளவை சீராக வைத்திருப்பதோடு, மன அழுத்தத்தையும் குறைத்து, உடல் எடையைக் கட்டுப்படுத்தும். எனவே, நீரிழிவு நோயாளிகள் எந்த நேரத்தில் உடற்பயிற்சி செய்வது சிறந்தது? என்பதை நோயாளிகள் தெரிந்துகொள்வது மிக முக்கியம். இதுகுறித்து நொய்டா மெட்ரோ மருத்துவமனை உள் மருத்துவ நிபுணர் டாக்டர் அக்ஷய் சக் விரிவாக விளக்குகிறார்.

காலையில் உடற்பயிற்சி செய்வதால் கிடைக்கும் நன்மைகள்

டாக்டர் அக்ஷய் கூறுகையில், “இரத்த சர்க்கரை கட்டுப்பாட்டில் இருக்கும் நீரிழிவு நோயாளிகளுக்கு காலை நேரம் சிறந்தது. குறிப்பாக வெறும் வயிற்றில் சிறிய அளவில் உடற்பயிற்சி செய்வது மிகுந்த நன்மையை அளிக்கும்” என்று கூறுகிறார்.

காலை உடற்பயிற்சியின் நன்மைகள்

* நாள் முழுவதும் இரத்த சர்க்கரையை சமநிலையில் வைத்திருக்கும்

* இன்சுலின் உணர்திறன் (Insulin Sensitivity) அதிகரிக்கும்

* உடலின் சக்தி நிலை மேம்படும்

* மன அமைதி மற்றும் ஒழுக்கம் கிடைக்கும்

கவனிக்க வேண்டியவை

* இன்சுலின் மருந்து எடுத்தால், வெறும் வயிற்றில் பயிற்சி செய்யும் முன் சர்க்கரை அளவை பரிசோதிக்கவும்.

* சர்க்கரை அளவு 100 mg/dl-க்கும் குறைவாக இருந்தால், பழம் அல்லது சிற்றுண்டி சாப்பிட்டு பயிற்சி செய்யவும்.

* சர்க்கரை அளவு 250 mg/dl-க்கு மேல் இருந்தால் அல்லது சிறுநீரில் கீட்டோன்கள் இருந்தால், உடற்பயிற்சி தவிர்க்கவும்.

இந்த பதிவும் உதவலாம்: உயர் இரத்த அழுத்தம் குறைய வேண்டுமா..? இந்த 5 காய்கறிகள் தினமும் சாப்பிடுங்க – நிபுணர் அறிவுரை

மாலை நேர உடற்பயிற்சி – டைப் 2 நீரிழிவு நோயாளிகளுக்கு சிறந்த தேர்வு

“டைப் 2 நீரிழிவு நோயாளிகளுக்கு மாலை நேரம் பாதுகாப்பானதும், பலன் தரக்கூடியதுமான நேரமாகும்” என்று டாக்டர் அக்ஷய் கூறுகிறார். உணவுக்குப் பிறகு இரத்த சர்க்கரை அதிகரிக்கும் போது, மிதமான உடற்பயிற்சி அதை சமநிலைப்படுத்தும்.

மாலை உடற்பயிற்சியின் நன்மைகள்

* உணவுக்குப் பிறகு சர்க்கரை அளவை குறைக்கும்

* மன அழுத்தம் மற்றும் சோர்வை நீக்கும்

* தூக்கத்தின் தரத்தை மேம்படுத்தும்

* குளுக்கோஸ் கட்டுப்பாட்டை மேம்படுத்தும்

கவனிக்க வேண்டியவை

* உணவுக்குப் பிறகு உடனே கடுமையான உடற்பயிற்சி செய்யக்கூடாது.

* இன்சுலின் மருந்து எடுத்துக் கொள்பவர்கள் மருத்துவரின் ஆலோசனையுடன் பயிற்சி தொடங்க வேண்டும்.

நீரிழிவு நோயாளிகளுக்கான முக்கிய உடற்பயிற்சி வழிமுறைகள்

* வாரத்திற்கு குறைந்தது 150 நிமிடங்கள் நடை, யோகா, அல்லது நீச்சல் போன்ற லேசான உடற்பயிற்சி செய்யவும்.

* வாரத்தில் 2–3 நாட்கள் எதிர்ப்புப் பயிற்சி (Resistance Training) செய்யவும்.

* உணவு சாப்பிட்ட பிறகு 10–15 நிமிடங்கள் நடைப்பயிற்சி செய்யவும்.

* நீண்ட நேரம் ஒரே இடத்தில் அமர்ந்து இருக்க வேண்டாம்.

* வசதியான காலணிகளை அணிந்து போதுமான நீர் குடிக்கவும்.

மருத்துவர் சொல்லும் இறுதி கருத்து

டாக்டர் அக்ஷய் சக் கூறுகையில், “காலையில் அல்லது உணவுக்குப் பிறகு 1-2 மணி நேரத்திற்குப் பிறகு உடற்பயிற்சி செய்வது பாதுகாப்பானது. இது ஒவ்வொருவரின் உடல் நிலை மற்றும் வாழ்க்கை முறைக்கு ஏற்ப மாறுபடும். ஆனால் தினமும் குறைந்தது 30 நிமிடங்கள் லேசான உடற்பயிற்சி செய்தல் அவசியம்,” என வலியுறுத்துகிறார்.

பொறுப்பு துறப்பு: இந்தக் கட்டுரை மருத்துவ நிபுணர்களிடமிருந்து பெறப்பட்ட தகவல்களின் அடிப்படையில் எழுதப்பட்டுள்ளது. இதில் கூறப்பட்ட வழிமுறைகளைப் பின்பற்றும் முன், உங்கள் மருத்துவரை அணுகவும்.