Holi Safety Tips: ஹேப்பியா, ஹெல்தியா ஹோலி கொண்டாட… இந்த டிப்ஸ்கள பாலோப் பண்ணுங்க!

$

நாளை மறுநாள் இந்தியாவில் ஹோலி பண்டிகை கொண்டாடப்படவுள்ளது. வண்ணங்களின் பண்டிகையைக் கொண்டாட அனைவரும் ஆர்வத்துடன் தயாராகி வருகிறோம். பண்டிகை கொண்டாட்டங்களின் போது எதிர்பாராத விதமாக நோய் தொற்றுக்கு ஆளாவது இயல்பானது. அதுவும் ஹோலி போன்ற கலர் பவுடர்களைக் கொண்டு விளையாடும் பண்டிகையில், ரசாயனங்கள் பயன்படுத்தப்படுவதால் எதிர்பார்க்காத வகையில் உடல் நலக்கோளாறு ஏற்படக்கூடும்.

எனவே ஹோலி பண்டிகைக்கு முன்னதாக ஆரோக்கியத்தை பாதுகாக்க எடுக்க வேண்டிய நடவடிக்கைகள் குறித்து அறிந்து கொள்ளுங்கள்…

இயற்கையான நிறங்கள்:

இந்த ஆண்டு ஹோலியின் போது இயற்கை வண்ணங்களைப் பயன்படுத்தவும்.இவற்றால் உங்களுக்கு எந்த வித அலர்ஜியும் வராது. சந்தையில் காணப்படும் பாதரச சல்பைடு, அலுமினியம் புரோமைடு மற்றும் காப்பர் சல்பேட் மற்றும் பிற இரசாயனங்கள் கொண்ட வண்ணப்பூச்சுகளைப் பயன்படுத்த வேண்டாம். இவை உங்களுக்கு ஒவ்வாமையை ஏற்படுத்தும்.

சரும பிரச்சனைகள் வராது:

ஹோலியின் போது சந்தையில் கிடைக்கும் வண்ணங்களில் மருதாணி, மஞ்சள் தூள், சந்தனம், பூ இதழ் பொடி போன்றவற்றை பயன்படுத்தலாம். அவை உங்கள் சருமத்திற்கு எந்தப் பாதிப்பையும் ஏற்படுத்தாது.

அலர்ஜி இருந்தால்:

அலர்ஜி இருப்பவர்கள், வண்ணங்களின் திருவிழாவான ஹோலி பண்டிகையில் இருந்து விலகி இருப்பது நல்லது. ஏனெனில் பெரும்பாலும் வண்ணப்பொடிகளில் ரசாயன கலப்படம் இருக்கும் என்பதால், சருமம் மற்றும் சுவாசம் சம்பந்தமான ஒவ்வாமைகள் ஏற்படக்கூடும். குறிப்பாக சிரங்கு, அரிக்கும் தோலழற்சி, ஆஸ்துமா உள்ளவர்கள் ஹோலி கொண்டாட்டத்தில் பங்கேற்காமல் இருப்பது நல்லது.

ஹோலிக்கு முன்:

ஹோலி பண்டிகைக்கு வண்ணங்களை தூவுவதற்கு முன் உங்கள் தோலில் தேங்காய் எண்ணெய் அல்லது பாதாம் எண்ணெய் தடவவும். இவ்வாறு செய்வதன் மூலம் உங்கள் சருமத்தில் நிறங்கள் நீண்ட காலம் நீடிக்காது. நிறங்கள் உங்கள் சருமத்தின் மீது பட்டாலும், அவை உடனடியாக விலகிப்போகும்.

சன்கிளாஸ்கள்:

ஹோலி விளையாடும்போது இயற்கையான வண்ணங்களைப் பயன்படுத்தும்போது உங்கள் கண்களுக்கு எந்த ஆபத்தும் ஏற்படாமல் இருக்க சன்கிளாஸ்களை அணிய வேண்டும். மேலும், வண்ணங்களைத் தூவும் போது, கண்களையும் உதடுகளையும் மூட வேண்டும்.

ஹோலிக்குப் பிறகு:

ஹோலி கொண்டாட்டங்களுக்குப் பிறகு நீங்கள் வெதுவெதுப்பான நீரில் குளிக்க வேண்டும். சாயங்கள் கலந்த ரசாயனங்களால் ஏதேனும் விபத்து ஏற்பட்டால் உடனடியாக மருத்துவரை அணுகவும். நீங்கள் வண்ணங்களை தூவும் போது, கோழி முட்டைகள், சேறு, வடிகால் நீர் ஆகியவற்றைப் பயன்படுத்தாமல் கவனமாக இருக்க வேண்டும்.

Image Source: Freepik