$
Reasons For Early Periods: ஒரு காலத்தில் 12 முதல் 14 வயது வரை உள்ள பெண்கள் தங்களது முதல் மாதவிடாயை எதிர்கொள்வார்கள். ஆனால், மாறிவரும் காலத்துக்கு ஏற்ப மாதவிடாய் வயதும் மாறிக்கொண்டே இருக்கிறது. பல பெண்கள் 10 வயதிலும், சிலர் 8 வயதிலும் பருவமடைகிறார்கள். இதற்கான காரணம் குறித்து இங்கே காண்போம்.
ஹார்மோன் மாற்றங்கள்
இளம் வயதிலேயே மாதவிடாய் வருவதற்கு முக்கிய காரணம் ஹார்மோன்களில் ஏற்படும் மாற்றங்கள். ஈஸ்ட்ரோஜன் மற்றும் புரோஜெஸ்ட்டிரோன் ஹார்மோன்கள் இனப்பெருக்க அமைப்பின் வளர்ச்சி மற்றும் கட்டுப்பாட்டுக்கு பொறுப்பு. இந்த ஹார்மோன்கள் பொதுவாக 8-14 வயதிற்குள் அதிகரித்து, மாதவிடாய் தொடங்கும். ஆனால், சில பெண்களில் இந்த ஹார்மோன்கள் இளம் வயதிலேயே அதிகரிக்க ஆரம்பிக்கும். இதன் காரணமாக முன்கூட்டியே பீரியட்ஸ் வருவதாக கூறப்படுகிறது.
மரபணுக்கள்
எட்டு வயதிலேயே மாதவிடாய் வருவதற்கு மரபணுக்களும் ஒரு காரணியாகக் கூறப்படுகிறது. ஒரு குடும்பத்தில் உள்ள பெண்களுக்கு, அதாவது அம்மா, அத்தைக்கு, சிறு வயதில் மாதவிடாய் ஏற்பட்டால், அதே குடும்பத்தில் உள்ள மற்ற பெண்களுக்கும் ஏற்படும்.
எடை அதிகரிப்பு
இளம் வயதிலேயே அதிக எடை அல்லது பருமனாக இருப்பதும் முன்கூட்டியே மாதவிடாய் வருவதற்கு வழிவகுக்கும். உடலில் உள்ள அதிகப்படியான கொழுப்பு திசுக்கள், ஈஸ்ட்ரோஜன் என்ற ஹார்மோனின் அளவை அதிகரிப்பதாகக் கூறப்படுகிறது. இது ஆரம்பகால மாதவிடாய்களை ஏற்படுத்துகிறது. அதிக எடை கொண்ட பெண்களுக்கு 8 வயதுக்கு முன் மாதவிடாய் ஏற்படுவதற்கான வாய்ப்பு 50% அதிகமாக இருப்பதாகக் கண்டறியப்பட்டது.
மாறிய வாழ்க்கை முறை
உடல் உழைப்பு குறைதல், உடற்பயிற்சியின்மை, நொறுக்குத் தீனிகளை உட்கொள்வது போன்றவையும் இந்தப் பிரச்னைக்குக் காரணம். ஏனெனில் நொறுக்குத் தீனிகளில் சர்க்கரை அதிகம். இதில் உள்ள ஆரோக்கியமற்ற கொழுப்புகள் ஹார்மோன் சமநிலையின்மைக்கு வழிவகுக்கும் என்றும், இது மாதவிடாய் சுழற்சியை பாதிக்கிறது என்றும் கூறப்படுகிறது.
சுற்றுச்சூழல் காரணிகள்
மாதவிடாய் முன்கூட்டியே தொடங்குவதற்கு சுற்றுச்சூழல் காரணிகளும் ஒரு காரணம். ஏனெனில், பூச்சிக்கொல்லிகள், பிளாஸ்டிக் பொருட்கள், தனிப்பட்ட பராமரிப்புப் பொருட்களில் உள்ள தாலேட்டுகள், பிஸ்பெனால் ஏ மற்றும் பிற இரசாயனங்கள் ஈஸ்ட்ரோஜன் உள்ளிட்ட பிற ஹார்மோன்களின் சமநிலையின்மையை ஏற்படுத்தும். இதன் காரணமாகவும் ஆரம்ப மாதவிடாய் ஏற்பட வாய்ப்பு உள்ளது.
ஊட்டச்சத்து குறைபாடு
இரும்புச்சத்து அல்லது வைட்டமின் டி குறைபாடு போன்ற ஊட்டச்சத்து குறைபாடுகளும் மாதவிடாய் ஆரம்பத்திற்கு வழிவகுக்கும்.
மன அழுத்தம்
நாள்பட்ட மன அழுத்தமும் மாதவிடாய் ஆரம்பமாகத் தொடங்குவதற்கு ஒரு காரணமாக இருக்கலாம். ஏனெனில் நாள்பட்ட மன அழுத்தம் ஹைபோதாலமிக்-பிட்யூட்டரி அட்ரீனல் அச்சை சீர்குலைக்கிறது. இது ஹார்மோன் சமநிலையின்மைக்கு வழிவகுக்கிறது. இது பருவமடையும் நேரத்தை பாதிக்கிறது மற்றும் ஆரம்ப மாதவிடாய்களை ஏற்படுத்துகிறது.
இளம் வயதில் மாதவிடாய் ஏற்படுவதால் ஏற்படும் சிக்கல்கள்
- இளம் வயதிலேயே மாதவிடாய் எலும்பு முதிர்ச்சியை துரிதப்படுத்துகிறது. இதனால், உயரம் அதிகரிக்க வாய்ப்பில்லை.
- மார்பகப் புற்றுநோய், இருதய நோய்கள், வளர்சிதை மாற்றக் கோளாறுகள் போன்ற சில நோய்களின் ஆபத்து அதிகமாகும்.
- இளம் வயதிலேயே மாதவிடாய் ஏற்படுவதால் பெண்களிடம் தன்னம்பிக்கை, மன அழுத்தம், பதட்டம் போன்றவை ஏற்படும்.