குடும்பத்தில் உள்ள பச்சிளம் குழந்தை முதல் வயதான பெரியவர்கள் வரை அனைத்து நபர்களின் ஆரோக்கியத்திலும் அக்கறை காட்டும் பெண்கள், தங்களது உடல் நலத்தில் அக்கறை காட்டுவது கிடையாது. அனைவரது தேவைகளையும் பார்த்து, பார்த்து கவனித்துக்கொள்ளும் பெண்களுக்கு தங்களை கவனித்துக்கொள்ள நேரம் இருப்பதில்லை. இப்படி ஆரம்பத்தில் அலட்சியமாக நடந்து கொள்வது தான், வயதாக வயதாக பெண்களின் உடல் நலத்திற்கு கேடாக அமைகிறது.
இதனால் தான் இந்தியாவில் நாளுக்கு நாள் பெண் நோயாளிகளின் எண்ணிக்கை அதிகரிப்பதாக கூறப்படுகிறது. வரும் முன் காப்பதே சிறந்து என்பதை மெய்ப்பிப்பது போல், எல்லாவற்றிலும் முன்னெச்சரிக்கை நடவடிக்கைகளை மேற்கொள்வது நல்லது.
குறிப்பாக நடுத்தர வயது பெண்கள் சந்திக்கும் பிரச்சனைகள் ஏராளம். 50 வயதிற்குள் நுழையும் ஒரு பெண்ணின் சூழ்நிலைகள் மிகவும் பிஸியாக இருக்கும். வஅன்றாட வாழ்க்கையின் பல பிரச்சனைகளுக்கு மத்தியில் பெண்கள் தங்கள் சொந்த ஆரோக்கியத்தைப் பற்றி சிந்திக்க நேரம் கிடைப்பது சாத்தியமில்லை.
உயர் இரத்த அழுத்தம், நீரிழிவு நோய், உடல் பருமன், தைராய்டு ஹார்மோன் குறைபாடு மற்றும் மாதவிடாய் நிறுத்தம் ஆகியவை 50 வயதுடைய பெண்கள் எதிர்கொள்ளும் பொதுவான உடல்நலப் பிரச்சினைகளில் சில. இவற்றை உரிய காலத்தில் தீர்க்க வேண்டும்.
உயர் இரத்த அழுத்தம் (High Blood Pressure):
இரத்த அழுத்தத்தில் ஏற்ற இறக்கம் என்பது 40 வயதிற்குட்பட்ட பெண்கள் எதிர்கொள்ளும் பொதுவான பிரச்சனைகளில் ஒன்றாகும். உயர் இரத்த அழுத்தம் என்பது ஒரு பரம்பரை நோயை விட வாழ்க்கை முறை மாற்றத்தால் ஏற்படுவதே அதிகம்.
வாழ்க்கையில் பொறுப்புகள் அதிகரிப்பதால், உடற்பயிற்சி குறைந்து, உணவுப் பழக்கம் மாறுகிறது. இது ஓரளவுக்கு இந்த நோயை வரவழைக்கிறது. ஆனால் உயர் இரத்த அழுத்தத்திற்கு கூடிய விரைவில் சிகிச்சை பெற வேண்டியது அவசியம்.
நீரிழிவு நோய்:
40 வயதிற்குப் பிறகு பெண்களுக்கு ஹார்மோன் மாற்றங்கள் இயல்பானது. மேலும் தொப்பை கொழுப்பு அதிகரிக்கிறது. உடலில் அதிகப்படியான கொழுப்பு சேர்வதால், இன்சுலின் என்ற ஹார்மோனின் செயல்பாட்டைத் தடுத்து, படிப்படியாக நீரிழிவு நோய்க்கு வழிவகுக்கிறது.
உடல் பருமன்:
வாழ்க்கை பரபரப்பில் நாம் மறந்துவிடக்கூடிய ஒன்று சரியான உணவு மற்றும் நடைமுறைகள். உயரத்திற்கு ஏற்ற எடை என்பது நாம் வாழ்க்கையில் நினைவில் வைத்து பின்பற்ற வேண்டிய ஒரு மந்திரம். உடல் பருமன் பல உடல்நல பிரச்சனைகளை ஏற்படுத்தும்.
தைராய்டு ஹார்மோன் மாறுபாடு:
தைராய்டு ஹார்மோன்கள் கழுத்தின் முன்புறத்தில் அமைந்துள்ள தைராய்டு சுரப்பியால் உற்பத்தி செய்யப்படுகின்றன. இந்த ஹார்மோன் நமது உடல் வெப்பநிலை மற்றும் இதய துடிப்பு உட்பட பல உடல் செயல்பாடுகளை ஒழுங்குபடுத்துகிறது. 
தைராய்டு சமநிலை இல்லாமல் இருக்கும்போது, வளர்சிதை மாற்றம், ஆற்றல் நிலைகள், உடல் வெப்பநிலை, கருவுறுதல், எடை அதிகரிப்பு/இழப்பு, மாதவிடாய், முடி ஆரோக்கியம், மனநலம் மற்றும் இதயத் துடிப்பு போன்ற உங்கள் உடலின் அனைத்து செயல்பாடுகளும் சீர்குலைந்துவிடும்.
மெனோபாஸ்:
பெரும்பாலான பெண்களில் 45 முதல் 55 வயதிற்குள் மாதவிடாய் நிறுத்தம் தொடங்குகிறது, மேலும் இது முன்னதாகவோ அல்லது அதற்குப் பின்னரோ இருக்கலாம். மாதவிடாய் அறிகுறிகள் பல. அதிக இரவு வியர்த்தல், செறிவு இல்லாமை, யோனி வறட்சி, பதட்டம் மற்றும் மனநிலை மாற்றங்கள் ஆகியவை பொதுவான அறிகுறிகளாகும். 
மாதவிடாய் நின்ற பிறகு கால்சியம் இழப்பு ஆஸ்டியோபோரோசிஸ் மற்றும் இருதய பிரச்சனைகளுக்கு வழிவகுக்கும். எனவே, இந்த காலகட்டத்தில் நல்ல தூக்க பழக்கத்தை பராமரிப்பது மற்றும் நிறைய ஓய்வு பெறுவது அவசியம். வலுவான மற்றும் ஆரோக்கியமான எலும்புகளை பராமரிக்க பெண்கள் கால்சியம், வைட்டமின் டி மற்றும் மெக்னீசியம் நிறைந்த உணவுகளை நிறைய சாப்பிட வேண்டும். மேலும், மூச்சுப் பயிற்சி மற்றும் தியானம் உடலையும் மனதையும் புத்துணர்ச்சியடையச் செய்கிறது.