ஆய்வுகள் 45 வயதிற்கு முன் மாதவிடாய் நிறுத்தம் உடல் பருமன் மற்றும் இதய நோய் அபாயத்தை அதிகரிக்கிறது என்பதைக் காட்டுகிறது.
45 வயதிற்குள் மாதவிடாய் நின்ற பெண்களுக்கு இதய செயலிழப்பு மற்றும் உடல் பருமன் ஏற்படும் அபாயம் அதிகம் என முந்தைய ஆய்வுகள் தெரிவிக்கின்றன. ஆனால் 55 வயது மற்றும் அதற்கு மேல் மாதவிடாய் நின்றவர்களிடையே இந்த ஆபத்து கணிசமாக அதிகரித்துள்ளதாக சமீபத்திய ஆய்வில் கண்டறியப்பட்டுள்ளது. அமெரிக்கன் ஹார்ட் அசோசியேஷன் இதழில் இந்த ஆய்வு வெளியிடப்பட்டுள்ளது.
மாதவிடாய் காலத்தில், ஒரு பெண்ணின் உடலில் ஈஸ்ட்ரோஜன் மற்றும் புரோஜெஸ்ட்டிரோன் ஹார்மோன்கள் குறைந்த அளவு உற்பத்தி செய்யப்படுகிறது. இந்த மாற்றங்கள் மாரடைப்பு உள்ளிட்ட பிற இதய நோய்களின் அபாயத்தை அதிகரிக்கலாம் என்று அமெரிக்கன் ஹார்ட் அசோசியேஷன் தெரிவித்துள்ளது.
மெனோபஸ் எப்போது ஏற்படும்?
பெண்களுக்கு மெனோபாஸ் பொதுவாக 45 முதல் 55 வயதுக்குள் ஏற்படும். ஆனால் சமீபத்தில் நடத்தப்பட்ட ஆய்வின் மூலம், கடந்த 60 ஆண்டுகளாக மாதவிடாய் நிறுத்தத்தின் சராசரி வயது 1.5 ஆண்டுகள் அதிகரித்துள்ளது என்பது தெரியவந்துள்ளது.
ஆனால் 1959-2018 தேசிய உடல்நலம் மற்றும் ஊட்டச்சத்து பரிசோதனை கணக்கெடுப்பின்படி, அமெரிக்காவில் 12.6 சதவீதம் பேருக்கு 45 வயதிற்கு முன்பே மாதவிடாய் நின்றுள்ளது. 14.2 சதவீதம் பேர் 55 வயதிற்குப் பிறகு மாதவிடாய் நிறுத்தத்தை அனுபவித்துள்ளனர்.
தாமதமான மாதவிடாய் பக்கவிளைவுகள்:
குறிப்பிட்ட வயதிற்கு முன்பாகவே மாதவிடாய் நின்ற பெண்களுக்கு இதய செயலிழப்பு ஏற்படுவதற்கான அதிக ஆபத்து உள்ளது என சில ஆய்வு முடிவுகள் தெரிவிக்கின்றன. இதயம் உடல் உறுப்புகளுக்கு போதுமான ரத்தம் மற்றும் ஆக்ஸிஜனை பம்ப் செய்ய முடியாமல் போவது இதய செயலிழப்பு ஆகும்.
உடல் பருமன் இதய செயலிழப்பு அபாயத்தை அதிகரிக்கிறது . மெனோபாஸ் உடலில் கொழுப்பு அதிகரிப்புடன் தொடர்புடையது என்பதால் இது நிகழ்வதாக கூறப்படுகிறது.
ஆய்வு முடிவுகள் சொல்வது என்ன?
சமீபத்தில் பெருந்தமனி தடிப்பு அபாயம் (ARIC) குறித்த ஆய்விற்காக 4,500 மாதவிடாய் நின்ற பெண்கள் தேர்ந்தெடுக்கப்பட்டனர். அவர்கள் வயது மற்றும் மாதவிடாய் வயதுக்கு ஏற்ப ஆய்வு செய்யப்பட்டனர். 45 வயதுக்கு முன் மாதவிடாய் நின்றவர்கள் ஒரு பிரிவாகவும், 45-49 வயதுக்கு இடைப்பட்டவர்கள், 50-54 வயது வரை ஒரு வகையாகவும், 55 ஆண்டுகள் கழித்து மற்றொரு பிரிவாகவும் பிரிக்கப்பட்டது. இதில் ஏற்கனவே இதயம் தொடர்பான பிரச்சனைகள் இருப்பவர்கள் ஆய்வில் இருந்து விலக்கப்பட்டனர்.
பங்கேற்பாளர்களின் சராசரி வயது 63.5 ஆண்டுகளாகும். மாதவிடாய் நிறுத்தத்தில் அவர்களின் வயது மற்றும் அவர்களின் எடை கணக்கிடப்பட்டது. இதையடுத்து மீண்டும் எடையின் அடிப்படையில் பெண்கள் மூன்று குழுக்களாகப் பிரிக்கப்பட்டனர். சாதாரண எடை, அதிக எடை மற்றும் பருமன் என வகைப்படுத்தப்பட்டனர். இது தவிர, அசாதாரண உடல் பருமன் வகையினரும் ஆய்வில் பங்கேற்றனர். 
இவர்கள் அனைவரும் டைப் 1 மற்றும் டைப் 2 நீரிழிவு, உயர் இரத்த அழுத்தம், சிறுநீரக செயல்பாடு, இதய நோய் போன்ற உடல்நலம் மற்றும் வாழ்க்கை முறை சார்ந்த ஆபத்து காரணிகளை சரிசெய்த பிறகு ஆய்வில் பங்கேற்க அனுமதிக்கப்பட்டனர்.
சராசரியாக 16.5 வருடமாக தொடர்ந்து நடத்தப்பட்ட ஆய்வின் படி, 900 பெண்கள் இதய செயலிழப்புக்கு ஆளாகியுள்ளனர். இது மருத்துவமனையில் அனுமதிக்கும் அளவிற்கு தீவிரமானதாகவோ அல்லது மரணத்திற்கோ வழிவகுத்துள்ளது.
தாமதமான மெனோபாஸ் பாதிப்புகள்:
மாதவிடாய் நின்றவர்களின் உடல் நிறை குறியீட்டெண் (BMI)
இந்த ஆய்வில் மாதவிடாய் நின்ற வயது உடல் நிறை குறியீட்டெண் மற்றும் இதய செயலிழப்பு அபாயத்துடன் கணிசமாக தொடர்புடையது என்பதைக் கண்டறியப்பட்டுள்ளது.
- 45 வயதிற்கு முன் மாதவிடாய் நின்றவர்களில் பிஎம்ஐயின் ஒவ்வொரு 6-புள்ளி அதிகரிப்பிற்கும் இதய செயலிழப்பு அபாயம் 39 சதவிகிதம் அதிகரித்துள்ளதாக கண்டறியப்பட்டது.
- 45 மற்றும் 49 க்கு இடையில் மாதவிடாய் நின்றவர்களில் பிஎம்ஐயின் ஒவ்வொரு 6-புள்ளி அதிகரிப்புக்கும் இதய செயலிழப்பு அபாயம் 33 சதவீதம் அதிகரித்துள்ளது.
- அதே 55 வயதுக்குப் பிந்தைய மாதவிடாய் நின்ற பெண்களில் இதய செயலிழப்பு ஆபத்து இரட்டிப்பாகும் என்று ஆய்வு முடிவு செய்தது.
- மாதவிடாய் நின்ற 55 வயது மற்றும் அதற்கு மேற்பட்டவர்களுக்கு இடுப்பு சுற்றளவு அதிகரிக்கும் ஒவ்வொரு ஆறு அங்குலத்திற்கும் இதய செயலிழப்பு ஆபத்து மூன்று மடங்காக அதிகரிப்பதாக ஆய்வில் கண்டறியப்பட்டுள்ளது.
45 வயதிற்கு முன் மாதவிடாய் ஏற்படும் போது, பெண்கள் தங்கள் மருத்துவர்களிடம் விளக்கி ஆரோக்கியமான வாழ்க்கை முறையை பின்பற்ற அறிவுறுத்தப்படுகிறார்கள். தாமதமாக மாதவிடாய் நின்றவர்கள் தங்கள் உடல் எடையை கட்டுக்குள் வைத்திருக்க வேண்டும் என்றும் பரிந்துரைக்கப்படுகிறது.
Image Source: Freepik