ஆரோக்கியம் நிறைந்த அவல் லட்டு… எப்படி செய்யணும் தெரியுமா?

யாருக்குத்தான் லட்டு பிடிக்காது. நமக்கு பிடித்த இனிப்புகளை ஆரோக்கியமாக சாப்பிட்டால் எப்படி இருக்கும் என எப்போதாவது நீங்கள் நினைத்தது உண்டா? அவல் லட்டு செய்வது எப்படி என பார்க்கலாம்.

தேவையான பொருட்கள்

வேர்க்கடலை - 1/4 கப், பொட்டு கடலை - 1/4 கப், அவல் - 1 கப் (250 மி.லி கப்), நெய், முந்திரி, திராட்சை, தண்ணீர் - 3/4 கப், வெல்லம் - 3/4 கப், துருவிய தேங்காய் - 1/2 கப், ஏலக்காய் தூள் - 1 தேக்கரண்டி.

செய்முறை படி - 1

முதலில் கடாயில் நிலக்கடலையை போட்டு இரண்டு நிமிடம் வறுத்து, பொட்டு கடலை சேர்த்து கலந்து விடவும். பின்னர் அவல் சேர்த்து இரண்டு நிமிடம் மிதமான தீயில் வறுக்கவும்.

செய்முறை படி - 2

இரண்டு நிமிடம் கழித்து அடுப்பை அணைத்து ஒரு தட்டில் எடுத்து போடவும். பிறகு அதே கடாயில் சிறிது நெய், முந்திரி, திராட்சை சேர்த்து வறுத்து தனியாக வைக்கவும்.

செய்முறை படி - 3

வெல்ல பாகு செய்ய, ஒரு பாத்திரத்தில் தண்ணீர் மற்றும் வெல்லம் சேர்த்து வெல்லம் உருகியதும் அடுப்பை அணைத்து தனியாக வைக்கவும். வறுத்த பொருட்களை மிக்ஸி ஜாரில் போட்டு அரைக்கவும்.

செய்முறை படி - 4

பிறகு ஒரு அகன்ற பாத்திரத்தில் வெல்ல பாகு, துருவிய தேங்காய், வேர்க்கடலை அவல் தூள், ஏலக்காய்த்தூள் சேர்த்து நன்கு கலக்கவும். கலவையை நன்கு கலந்து, வறுத்த முந்திரி, திராட்சை மற்றும் இரண்டு மேசைக்கரண்டி நெய் சேர்க்கவும்.

செய்முறை படி - 5

பிறகு அடுப்பை அணைத்து விட்டு கலவையை ஒரு தட்டில் வைத்து முழுமையாக ஆற வைக்கவும். கலவை ஆறிய பிறகு அதில் சிறிது எடுத்து லட்டுவாக பிடிக்கவும். சுவையான அவல் லட்டு தயார்.